ജനകേരളയാത്ര ഇന്ന് കോഴിക്കോട്

കോഴിക്കോട്: സോഷ്യല്‍ ഡമോക്രാറ്റിക് പാര്‍ട്ടി ഓഫ് ഇന്ത്യ സംസ്ഥാന ജനറല്‍ സെക്രട്ടറി എം കെ മനോജ്കുമാര്‍ നയിക്കുന്ന ജനകേരള യാത്ര ഇന്ന് കോഴിക്കോട്ടെത്തും. വൈകീട്ട് 5.30ന് വെള്ളയില്‍ പുതിയ കടപ്പുറത്തും ഏഴിന് മാത്തോട്ടത്തും സ്വീകരണം നല്‍കും. വൈകീട്ട് അഞ്ച് മണിക്ക് ജാഥാ ക്യാപ്റ്റന്‍ മനോജ്കുമാര്‍, സംസ്ഥാന പ്രസിഡന്റ് അഡ്വ. കെ പി മുഹമ്മദ് ഷരീഫ് തുടങ്ങിയവര്‍ ക്ഷണിക്കപ്പെട്ട പ്രമുഖ വ്യക്്തികളെ അഭിമുഖീകരിക്കും. ഇന്ന് രാവിലെ അടിവാരം വഴി ജില്ലയിലേക്ക് പ്രവേശിക്കുന്ന ജനകേരളയാത്രക്കു ഒമ്പതിന് ഈങ്ങാപ്പുഴ, 10ന് താമരശ്ശേരി, 11ന് കൊടുവള്ളി, 12ന് മുക്കം, മൂന്നിന് കുറ്റിക്കാട്ടൂര്‍, നാലിന് കുന്ദമംഗലം എന്നിവിടങ്ങളിലാണ് സ്വീകരണങ്ങള്‍ നല്‍കുക. രാത്രി എട്ടിന് രാമനാട്ടുകരയില്‍ ജില്ലാതല സമാപനം നടക്കും. ജാഥാ വൈസ് ക്യാപ്റ്റന്‍ അഷ്‌റഫ് മൗലവി മൂവാറ്റുപുഴ, സംസ്ഥാന സമിതിയംഗം തുളസീധരന്‍ പള്ളിക്കല്‍, വൈസ് പ്രസിഡന്റ് പി കെ ഗോപിനാഥന്‍, സെക്രട്ടറി പി കെ രാധ  പങ്കെടുക്കും.
തിങ്കളാഴ്ച രാവിലെ അഴിയൂര്‍ വഴി കോഴിക്കോട് ജില്ലയില്‍ പ്രവേശിച്ച ജനകേരളയാത്രക്ക് ജില്ലാ പ്രസിഡന്റ് പി അഹമ്മദ് ശെരീഫിന്റെ നേതൃത്വത്തില്‍ സ്വീകരണം നല്‍കി. കൊയിലാണ്ടി, ഉള്ളിയേരി, പേരാമ്പ്ര, ആയഞ്ചേരി, വടകര, നാദാപുരം, കുറ്റിയാടി എന്നിവിടങ്ങളില്‍ മുഖ്യ സ്വീകരണാനന്തരം വയനാട് ജില്ലയിലേക്ക് പ്രവേശിക്കുകയായിരുന്നു. കുറ്റിയാടിയില്‍ ഉത്തരമേഖലാ സമാപന സമ്മേളനം എസ്.ഡി.പി.ഐ ദേശീയ ജനറല്‍ സെക്രട്ടറി എ സഈദ് ഉദ്ഘാടനം ചെയ്തു. ജില്ലാ പ്രസിഡന്റ് അഹമ്മദ് ശരീഫ് അധ്യക്ഷത വഹിച്ചു. പി അബ്്ദുല്‍ ഹമീദ്, ഇസ്്മായില്‍ കമ്മന, സൂപ്പി മാസ്റ്റര്‍, തുളസീധരന്‍ പള്ളിക്കല്‍ സംസാരിച്ചു. ഭീകര വിരുദ്ധ യുദ്ധങ്ങളും വികസനവും ആഘോഷമാക്കി മാറ്റുന്നതാണ് നാമിപ്പോള്‍ ചെയ്തുവരുന്നതെന്ന് എ സഈദ് ചൂണ്ടിക്കാട്ടി. അടിസ്ഥാന പ്രശ്‌നങ്ങള്‍ വിസ്്മരിച്ചു കൊണ്ടുള്ള ഈ ആഘോഷങ്ങള്‍ക്കൊണ്ടു സമൂഹത്തിന് യാതൊരു പ്രയോജനവുമുണ്ടായിട്ടില്ലെന്നും അദ്ദേഹം വ്യക്്തമാക്കി.